ចិន៖ មានប្រជាពលរដ្ឋប្រហែលជិត ១លាននាក់ហើយបានស្នើសុំការអនុញ្ញាតក្នុងការធ្វើដំណើរពីទឹកដីចិនដីគោក ចេញទៅកាន់ហុងកុង តៃវ៉ាន់ និងម៉ាកាវ ចាប់តាំងពីការបើកទ្វារព្រំដែនវិញកាលពីថ្ងៃទី០៨ ខែមករា ឆ្នាំ២០២២ កន្លងទៅ។
ចំនួនឯកសារបំពេញពាក្យសុំមានចំនួនប្រមាណជា ៩៩៨,០០០ ដែលមានការកើនស្មើនឹងប្រមាណ ១៤៧,៦ភាគរយ បើធៀបនឹងរយៈពេលដូចគ្នាមុនពេលដែលមានការផ្ទុះឡើងនៃវីរុសកូវីដ-១៩ ដែលជាពេលវេលាដ៏លំបាកបំផុតរបស់ប្រជាជនចិនក្នុងការធ្វើដំណើរចេញ និងចូលក្នុងប្រទេស។
ទិដ្ឋភាពដ៏ជក់ចិត្ត និងគួរឱ្យចាប់អារម្មណ៍បំផុតបានកើតឡើងនៅច្រកទ្វារអាកាសយានដ្ឋាន កំពង់ផែចំណត និងច្រកព្រំដែន ដែលជាទិដ្ឋភាពពោរពេញដោយមនោសញ្ចេតនានៃការជួបជុំគ្នាឡើងវិញរបស់អ្នកដំណើរ ដែលភាគច្រើនពួកគេខកខានជួបជុំគ្នាជិត ៣ឆ្នាំមកហើយ រាប់ចាប់តាំងពីការផ្ទុះឡើងជាសកលនៃវីរុសកូវីដ-១៩។
មានអ្នកដំណើរម្នាក់ដែលកំពុងរៀបចំឯកសារក្នុងការឆ្លងច្រកព្រំដែន ហ្វូធាន នៃទីក្រុង សិនចិន បានលើកឡើងថា នេះជាពេលវេលាដ៏រីករាយបំផុតមួយដែលនាងបានជួបជុំស្វាមី និងកូនស្រីរបស់នាងឡើងវិញ ក្រោយខានជួបគ្នាប្រកបដោយទឹកភ្នែកនៃការរំភើប។
គួរបញ្ជាក់ថា ក្នុងចំណោមការស្នើសុំចាកចេញទៅក្រៅប្រទេសចិនជាង ១លាននាក់នេះ មានប្រមាណជាជិតកន្លះលាននាក់បានដាក់ឯកសារស្នើសុំត្រឹមរយៈពេលប្រមាណត្រឹមប្រាំថ្ងៃ ពីថ្ងៃទី០៨ ដល់ថ្ងៃទី១២ ខែមករា បន្ទាប់ពីប្រទេសចិនបានលុបចោលនូវការតម្រូវធ្វើចត្តាឡីស័ក និងបន្ធូរបន្ថយការរឹតបន្តឹងការធ្វើដំណើរផ្សេងទៀត៕
